Pandemiyadan varlanan “Paşa Holdinq”
Paytaxtda hamı bunu müzakirə edir. Birinci ailəyə məxsus restoranlar işləyir, orada bahalı partilər baş verir. Şəhərin elitası “Port Bakı”da və Mehriban Əliyevaya məxsus diqər yerlərdə dincəlir. Kasıb təbəqəni düşünən olmadı. Azərbaycana nəzər salanda təəssüf etməmək, stress keçirməmək, qəzəblənməmək mümkün deyil. Bu axı nə karantindir? Yalnız kasıblar üçün? Belə olmamalıdır. Bu ölkədə vətəndaşın təminatlı olması, normal yaşaması, sabaha ümidlə baxması üçün hər şey var. Bu dövlət dünyaya səs salacaq potensiala malikdi. Amma bu ölkənin vətəndaşı səfil, didərgin, ümidsizdi. Ona görə ki, kasıbı evində karantin keçirdir, varlısı isə M.Əliyevanın restoranında. Bu dövlət hər gün zəiflədilir, heç bir sərvəti olmayan qonşu ölkələri bizə nümunə göstərirlər. Bəli, İlham Əliyevin rəhbərlik etdiyi, Paşayevlərin epidemiya kimi yayıldığı ölkə hər gün çökdürülür. Bu dövlətin qurulmasında heç bir əməyi olmayan, mənəvi baxımdan bura aid olmayan adamlar, bu ölkəyə hökmranlıq edirlər. Bu ölkənin dilinə, adət-ənənəsinə, tarixinə ögey münasibət bəsləyən adamlar, bu ölkədə ağalıq edirlər. 10 milyon insana məxsus olan sərvət, bir ailənin nəzarətinə keçib. Vətəndaşı qula çevirib, özlərin kral elan ediblər. Ölkənin ən dilbər guşələri, ən gəlirli sahələri Paşayevlərin şəxsi mülkünə çevrilib. Sığorta şirkətləri, restoranlar, banklar, iri marketlər, ticarət mərkəzləri, dərman monopoliyası, ərzaq monopoliyası Paşayevlərə məxsusdu. “Paşa Holdinq” özlüyündə bir dövlət olub. Azərbaycanı Paşabaycana çeviriblər. Heç bir mülkiyyət hüququna hörmət etmədən, istədikləri yeri zəbt edirlər, heç bir insan haqqı tanımadan istədikləri adamı şantaj edirlər. Bütün vəzifələrdə Paşayevlərin kadrları, bütün əlverişli yerlərdə Paşayevlərin obyektləri, bütün gözəl ölkələrdə Paşayevlərin mülkləri olmalıdır. Var-dövlət, hakimiyyət hərisliyi gözlərin elə tutub ki, ayaqlarının altını görmürlər. Vətəndaşı qəpik-quruşa möhtac edib, özlərinə xoşbəxtlik imarəti qurublar.Bu torpaqların azadlığı uğrunda mübarizə aparmayıblar, səngər görməyiblər, hətta arxa cəbhədə olmayıblar. Ölkənin ən ağır vaxtlarında xaricdə gizləniblər.
Amma ölkənin azadlığı uğrunda vuruşanlara divan tuturlar, istiqlalın əleyhinə səs verənləri yuxarı başa keçirirlər. Bu ölkəyə faciələr ixrac edənlərdən orden-medal alıb, dövlətin maraqların şəxsi mənafelərinə qurban edirlər. Əslində, Paşayevlərin bugünkü “performans”ı Azərbaycan xalqın təhqir etməkdi. Faktiki olaraq vətəndaşın varlığı nəzər alınmır. Polis dəyənəyinə arxayın olub, rəsmən mafioz qüvvə kimi fəaliyyət göstərirlər. Bu ailə bu günə qədər xalqın bütün faciələrindən mənfəət götürüb. Kür daşqınlarından tutmuş, devalvasiyaya qədər. Bu gün də koronavirusla mübarizə adı altında ianə toplayırlar. Amma küllü miqdarda pul yığılsa da, heç bir ailəyə yardım olunmayıb. Gürcüstanda koronavirusla mübarizəyə milyonlar yardım ediblər, amma Azərbaycanda hər ailəyə 190 manat yardım etməyə ehtiyac görmürlər. Çünki bu xalqla ortaq heç nəyə sahib deyillər. Bu xalqa özlərini borclu saymırlar. Elə bilirlər ki, nefti bunların dədə-babaları ixtira edib.Bu gün Paşayevlərin yalnız bir planı var. Əbədi hakimiyyətə təminat almaq, Mehriban Əliyevanı prezident kürsüsünə əyləşdirmək. Bunun üçün xalqın deyil, Rusiyanın və Qərbin razılığın almaq arzusundadırlar. Bu arzuya çatmaq üçün yüzminlərlə insanın məhv olmasına, büdcənin tamam əridilməsinə də razıdırlar.
Bunların düşüncəsinə görə Konstitusiyanın bütün maddələri Paşayevlərə “qanun sənsən” deyir. Bunu karantin da sübüt edib. Bunlar hesab edirlər ki, Paşayevlərin maraqları üçün dövlətə rahatlıqla xəyanət etmək olar. Əlbəttə, Azərbaycan xalqı bu adamlara etimad göstərmir. Amma ölkə vətəndaşlarının böyük əksəriyyəti bu zehniyyətin dövləti nə qədər böyük təhlükəyə atdığının fərqində deyil. Bunlar təkcə maddi sərvətləri talan etmirlər, həm də mənəvi dəyərləri, genefondu məhv edirlər. Keyfiyyətsiz qidaların, tərkibi dəyişdirilmiş dərmanların vətəndaşa təqdim edilməsi, təhsilin və səhiyyənin iflic vəziyyətə salınması, sağlam düşüncəni və sağlam bədəni xəstələndirməkdi.Bütün müşahidələr onu deməyə əsas verir ki, Paşayevlər Əliyevlərə rəhmət oxutduracaq. Humanizm, multikulturalizm, tolerantlıq adı altında məkrli planlar cızırlar. Paşayevlər pambıqla baş kəsməyi təcrübədən keçirirlər. Azərbaycanı bir ailənin ölkəsi, “Paşa Holdinq”i dövlət kimi görən adamlar, bir xalqa ancaq cəhənnəm təqdim edə bilərlər. Ona görə də Azərbaycan xalqı ona məxsus olanı heç kimə güzəştə getməməlidir. Ölkənin 20 faizini erməni, 80 faizini Paşayevlər işğal edib. Böyük işğaldan azad olmadan, kiçik işğala son qoymaq mümkün deyil.
