Qənimət Zahid
Gündəm olmasın deyə yazıram, “indi bunun yeri deyil” silsiləsindən olsun. Səyavuş Novruzov uzun bir sicilləmə yazıb, eynən Əli Həsənovun qürubundan əvvəlki şövqlə və sözünün mustafa yerində də qeyd edib: “Əli Kərimli, Cəmil Həsənli, Qənimət Zahid, Gültəkin Hacıbəyli, Arif Məmmədov, Ramiz, Arif və Leyla Yunus, Sevinc Osmanqızı kimi “beşinci kolon” nümayəndələri haqq işimizdə ermənipərəst mövqe tutmaqla bir daha Azərbaycan xalqına və dövlətinə qarşı düşmənçilik mövqeyi nümayiş etdirirlər. Bizim hər qələbəmiz, Ali Baş Komandanımızın hər zəfər müjdəsi onları məyus, narahat edir”.
Mən şərh verməzdim, amma bu ritorika bütün mümkün pauzalarda hətta yapon dilində də səsləndirilir, ona görə də gündəm olmasın, yaddaş olsun deyə yazıram.
-Qarabağı azad etmək iqtidarda kim olur- olsun, həmin hakimiyyətin borcudur;
-Qarabağın azad edilməsi həm hərbi, həm də mülki prosesdir və Azərbaycanda bu prosesə dəstək verməyən 2-3 nəfər varsa da, onları bütün aktiv cəmiyyət tanıyır, Səyavuş kimilərin “gid”liyinə də kimsənin ehtiyacı yoxdur;
-Müharibə davam edir və bu savaş başlayandan sona qədər ölkədə müxalifətçilik, faktiki olaraq, dondurulub, hamı bacardığı qədər və əlindən gələn qədər bu proseslərə dəstək verir;
-Qarabağın azad edilməsi üçün müharibədə az qala bütün Azərbaycan xalqı iştirak edir;
-Əgər müharibənin getdiyi indiki ərəfədə şəxsən mənim fəaliyyətim Səyavuş kimilərin fəaliyyətindən daha az olsaydı, özümü onun yerinə qoyardım; eləcə də, onun tərtib etdiyi siyahıdakı hər kəs Ordunun və millətin qələbəsi üçün daha böyük xidmətləri oıan şəxslərdir!
-Qarabağın azadlığı üçün Ordumuzun, əsgərimizin uğurlarına, şücaətinə Azərbaycanda diktaturanı bərkitmək şansı kimi baxan bütün nəzərləri kor, bütün düşüncələri korafəhim sayıram;
-Səyavuş Novruzov və ona bənzərlər bu tip açıqlamaları ilə erməni yox (bu faktor aktuallığını itirib), başqa düşmənlərin məkrinin güdazına peyvənd olur;
- Nəhayət, ərazi bütövlüyü təmin edilən Azərbaycan azad bir xalqın ölkəsi olmalıdır və olacaqdır! Çünki, azərbaycanlılar artıq imtiyazlı xalqdır və azadlıq bu imtiyazların önündə gəlir! Səyavuş Novruzovların nəyi necə qırıldatmasına baxmayaraq!
