Yadınızdadırsa “Azərsu” ASC-nin sədri Qorxmaz Hüseynovun məşhur bir “aforizmi” sosial şəbəkələrə məsxərə olmuşdu. Sədrin “Bakıda əhalinin çoxalması, yeni yaşayış sahələrinin tikilməsi, sudan istifadənin artması kanalizasiya xətlərinin həddən artıq yüklənməsinə səbəb olur” sözləri sosial şəbəkələrdə günlərlə lağa qoyulmuşdu. Əhali boş yerə “Azərsu”ya kanalizasiya milyardlarını yeyən qurum adı verməyib. O, ölkə əhalisinin problemləri ilə bağlı ən çox gündəmə gələn dövlət qurumlarından biridir. Hətta, İlham Əliyev qeyd etdi ki, məhz Azərsu məmurlarına görə Azərbaycan səhraya çevrilə bilər. Qorxmaz Hüseynov və müavinləri isə deyirlər ki, “Azərsu”da problemlərə görə artıq statusunu itirmiş keçmiş spiker və gardaşı Nazim Əsədov cavab verməlidir. Onlar Oğuz-Qəbələ tenderindən tutmuş Azərsuyun diqər sahələrinə gədər cinayət qrup yaradaraq böyük yeyintilər ediblər. Nazim Əsədov “Zamin-Bank”da payı var idi və Zamin Bank vasitəsilə Azərsu ASC-nin tenderlardan qazanılmış pulları “yuyub”. O, həmçinin Azərsu ASC-nın rəhbərliyinə qarşı qara piar kampaniyasını aparıb.
Əsədov gardaşlarına görə qurumun adı həm də zaman-zaman böyük korrupsiya qalmaqallarında hallanıb. Mediada yer alan məlumatlara görə, təkcə 2000-2010-cü illər arasında bu quruma kreditlərlə birgə ayrılan vəsaitin ümumi məbləği 4, 8 milyard manat olub. Həmin vəsaitlərin böyük bir hissəsi paytaxtda kanalizasiya sistemlərinin qurulmasına xərclənsə də, şəhər əhalisi illərdir bunun nəticəsini görə bilmir. Lakin Nazim Əsədov İstanbulda, Sankt-Peterburqda binalar, otellər, shoppinq-mollar qura bilib.
Göy üzünə bulud gələn kimi, paytaxtın küçələrində əvvəlki mənzərə təkrarlanır, keçidlər, yollar, dayanacaqlar sel içində üzməyə başlayır. Biz hələ suyun keyfiyyəti ilə bağlı məsələləri demirik, o ölkənin daha ağrılı, daha köklü problemidir. Hamı bilir ki, Qorxmaz Hüseynov SOCAR-ın prezidenti Rövnəq Abdullayevin adamıdır. İllərdir biri neftin, biri suyun qabağını kəsib, arxı öz bostanına axıdır. Amma biz bu bəladan qurtarmağını yolunu hakimiyyətə göstərə bilərik. Bir halda ki, ölkədə müxtəlif qurumların birləşdirilməsinə başlanıb, fəaliyyətsiz “Azərsu”nun mövcud qurumlardan birinin tabeçiliyinə verilməsi təklifinə niyə baxılmasın? Axı, bu qədər milyardlar xərclənib, ortaya səmərəli bir iş qoya bilməyən təşkilat kimin nəyinə gərək? Onu müzakirəsiz, mübahisəsiz ləğv edib, Ekologiya Nazirliyinin tabeçiliyinə vermək olmazmı məsələ bitib getsin?
“Neft daşları”ndan “Azərsu”ya qədər gələn yol
İllərdir iri məmurlar arasında didişmə meydanına çevrilən “Azərsu” zaman-zaman fərqli adamların nəzarətində olub. İndi Hüseynovu hamı “SOCAR”-ın prezidenti Rövnəq Abdullayevin adamı kimi tanıyır. Məsələn, İqbal Məmmədovun açıqlamalarından da aydın olur ki, onların dostluğu tələbəlik illərindən başlanıb. “Mən vaxtı ilə Dövlət Neft Şirkətinin prezidenti Rövnəq Abdullayevlə, “Azərsu” ASC-nin sədri Qorxmaz Hüseynovla bir yataqxanada qalmışam. Təyinatla Neft Daşlarına düşmüşdük. Çox yaxın dostlarıq. Xalq Təsərrüfatı bitirənlərdən imkanlılar çox idi, onları yaxşı yerlərə təyin edirdilər. Bizim kimi adamı olmayanlar isə Neft Daşlarına göndərilirdi. Bu gün hərəsi dövlətdə yüksək vəzifədədir. Rövnəq Abdullayevin çox gözəl yoldaşlığı var. Yaxşı yeməklər bişirə bilirdi. Mən həmişə bir şeyə görə Rövnəq Abdullayev və Qorxmaz Hüseynovdan inciyərdim. Mənə qabları yuduzdururdular. Çünki yemək bişirməyi bacarmırdım.” Deputat bircə onu deməyib ki, hər üçü pillələri qalxa-qalxa yaxşı pul yumağı öyrəniblər. Abdullayev SOCAR-a prezident keçən kimi Qorxmaz Hüseynovu yanına gətirib, Sosial İnkişaf İdarəsinin rəisi vəzifəsinə qoyub. 2007-ci ildə o, şirkətin sosial məsələlər üzrə vitse-prezidenti təyin edilib, 2011-ci ildə isə həmin vəzifədən azad edilərək “Azərsu” Açıq Səhmdar Cəmiyyətinin sədri vəzifəsinə göndərilib. O vaxtdan Abdullayev “Azərsu”dan şəxsi təsərrüfatı kimi istifadə etməyə başlayıb. İş o yerə gəlib çatıb ki, adam şəxsi obyekti “Xalq Bank”ın ofisini də “Azərsu”ya məxsus ərazidə tikdirib.
Bu il “Azərsu”da reformalar olacaq və köhnə yeyintilərə görə kimsə cavab verməli olacaq…
