Parlament niyə buraxıldı, niyə yığılacaq?
Hələ ötən ilin ortalarından söhbət gəzirdi ki, növbədənkənar parlament, növbədənkənar prezident seçkiləri keçiriləcək. Hakimiyyət dəhlizlərində baş verənlər, klanlararası qarşıdurmalar da göstərirdi ki, Mehriban Əliyevanı önə çıxarmaq ssenarisi hazırlanır. Daha doğrusu sürətlə önə gedən Paşayevləri rəsmi şəkildə “taclandırmaq” istəyirlər. Təbii ki, hakim ailənin əsas planı bu seçkilərə imitasiya ədviyyatı qatmaq, islahat görüntüsü yaradaraq addımlamaq idi. Ona görə də müəyyən “kadr islahatları” mesajı verildi və müxtəlif şəxslərin diliylə ” seçkidə yeni simalar olacaq” təbliğatı aparıldı. Ardınca “Striptiz” Məclis buraxıldı və növbədənkənar parlament seçkilərinin vaxtı təyin edildi.
Bələdiyyənin qəzaya saldığı Parlament
Əslində, Milli Məclis pultu Prezident Administrasiyasında olan oyuncaq maşındı. Əliyevlər dövründə bu qurumun buraxılması qeyri-ciddi görünür. “Milli Məclisə əl gəzdirilir” deyilsə, daha doğru olar. Yəni, bəzi yeni adamlar peyda olacaq və Milli Məclis kosmetik dəyişikliyə uğrayacaq. Qoca mandat gəzdirənlərin yanında, yeni mandat mükafatı alanlar da olacaq.Amma hökumətin acgöz, həris mahiyyəti dekabrın 23-də keçirilən seçkilərlə, fevralın 9-na yekə bir qapaz saldı. Hətta bələdiyyə seçkilərində yarımşəffaf mənzərə yarada bilmədilər. Məsələn, gənc bloggerin səsini oğurlamamaqla, müəyyən şəffaflıq görüntüsü yaratmaq olardı. Ölkə boyu “karusel” əməliyyatlarından sonra 32 faiz seçici aktivliyinin olduğu rəsmən etiraf edildi. Ölənlərin adına səs verilməsi, topa bülletenlər də “ölü”yə nəfəslik olmadı. Məlum oldu ki, 750 mindən artıq YAP bileti daşıyanlar da seçkini boykot etdi. Əks halda, təkcə YAP vəsiqəsi daşıyanların ailələrinin hesabına kifayət qədər aktivlik yaratmaq olardı. Deməli, bu ölkədə seçkinin dəfn edildiyini hamı dərk edir və “onsuz da qutudan istədikləri adam çıxacaq” fikri daşlaşıb.Beləliklə, hökumətin bələdiyyə seçkilərindəki “performans”ı, parlament seçkilərini qəzaya uğratdı. Hamı parlament seçkilərində daha kobud seçki pozuntuları, daha rüsvayçı mənzərə gözləyir.
Milli Məclis “Bravo” marketləri kimi
Gələk, məsələnin əsas hissəsinə. Ağıllı adamların hamısına agahdır ki, bu həngamənin əsas səbəbi parlamenti Mehribanlaşdırmaqdı. Bəli, bu dəfə Paşayevlər qarşısında fərdi öhdəlik götürənlərə mandat veriləcək. Təvəllüdcə gənc olub, təfəkkürcə qocalmış adamlar mandat alacaq. Bir neçə müxalifət libası geyinmiş “Paşayevçi” yə də şans veriləcək. Şəhərin hər yerində “Bravo” marketlər açan Mehriban xanım, Milli Məclisi də “siyasi Bravo” ya çevirəcək. Bu parlament marketində yalnız onun sertifikat verdiyi mallar satılacaq. İstifadə müddəti bitmiş məhsullara yeni “istehsal tarixi” yapışdırılacaq. Yəni, “siyasi qida təhlükəsizliyi”nə Paşayevlər təminat verəcək. Yeni şou deputatların əsas missiyası isə, Mehriban Əliyevanın prezidentliyə gedən yoluna “su səpmək” olacaq. Əminliklə deyirik ki, bütün bu “şou proqramlar” Mehribanı prezident kreslosuna əyləşdirməyə hesablanıb. 9 fevraldan sonra bu daha açıq görünəcəkYeni simalar nə Maltadan danışa biləcək, nə ofşorlardakı milyardları dilə gətirəcək, nə də xalqın maraqlarını müdafiə edəcəklər. Onlar “kreativ” yaltaqlanacaqlar.
Xalqı növbəti dəfə ələ salmaq
Ölkə vətəndaşı anlamalıdır ki, onu növbəti dəfə ələ salırlar. Növbəti dəfə bir xalqın taleyi bir ailənin daha çox qazanmaq ehtirasına qurban verilir. Seçki o qədər ucuzlaşdırılıb ki, Toliklər, Samiraldolar, Bayram Nurlular xalqın vəkili olmaq istəyir. Əksə halda, belə adamlar deputat olmaq eşqinə düşməzdi, bu məsuliyyətin altına girmək istəməzdi. Onlar da görürlər ki, deputat olmaq üçün intellektə, xalqa xidmətə, yaxşı tərcümeyi-hala ehtiyac yoxdur. Yaxşı yaltaqlanmaq, bir ailəyə sədaqət göstərmək “mandat imtahanı”ndan keçməyə kifayət edir. Həm də şou əhli əmindir ki, Elmanlardan, Siyavuşlardan, Hadilərdən daha çox səs qazana bilərlər. Uzun illərdi Azərbaycan xalqına elə adamları vəkil ediblər ki, Samiraldolar müqayisədə daha şanslı görünür. Bütün bunlar isə hakimiyyətin başında duranların xalqı ayaqaltı kimi görməsindən qaynaqlanır.
