Rafiq Manaflı
Çoxlarının dünyası çörəyi çıxdığı dairənin içində dövr edir. Pivə satan sel kimi tər axıda-axıda istiyə, xaş satan şaxtadan dişləri bir-birinə dəyə-dəyə soyuğa sevinir, müştəriləri çox olacaq. Siyavuş Novruzov qımışa-qımışa yalan, Əli Həsənov pörtə-pörtə hədyan danışıb ruzisini qazanır. Vəssalam. Dairə qapandı. Bundan o yana dünya yoxdur.
Oturuşmuş cəmiyyətlərdə bu bəlkə də normal haldır, satan satacaq, guran quracaq. Heç yaltaq-yultaq da yerdə qalmayacaq, onların da öz oyuqları olub, var, olacaq.
Bu dünyanın hər yerində belədir. Amma hər bir xalqın tarixində dönüş nöqtələri, yol ayrıcları olur. Satan da, quran da, yaltaqlanan da etdiklərini bir kənara qoyub yığışır, birlikdə hara gedəcəklərini müəyyənləşdirir, yola varırlar. Və sonra satan qayıdır satmağına, quran qurmağına, yaltaqlanan da yaltaqlanmağına.
Bu gün biz də bir millət, bir xalq olaraq seçim qarşısındayıq. Şərait nə qədər mürəkkəb olsa da seçim çox sadədir: monarxiya, yoxsa respublika.
Bu gündən o yana heç nəyi görməyən feodal təfəkkürlü insanların bizi sürüdükləri orta əsrlər təbəəçilik sistemi, yoxsa insan azadlıqları, hüquq və qanun – seçim yalnız budur, özünə, sözünə hansı bərbəzək vurmağından asılı olmayaq.
Biz, dünyanın bizdən heç nə ilə artıq olmayan çox millətlərinin seçdiyi, diktat altında inləyənlərin isə həsrətlə baxdığı demokratiya, azadlıq, insan hüquqları, qanunçuluq yolu deyirik və özünün, övladlarının sabahını fikirləşən bütün soydaşlarımızı sentyabrın 28-də təşkil edəcəyimiz mitinqə dəvət edirik.
Bu mitinqin həm iştirakçısı, həm də təşkilatçısı kimi sabahımızın arxitektoru olmaq bir xalq olaraq hər birimizin boyun borcumuzdur.
