Müsavat Partiyasının fəalı İlqar Mahmud sentyabrın 14-də Binəqədi Rayon Məhkməsinin qərarı ilə 300 manat cərimə edilib.
İ.Mahmud deyib ki, sentyabrın 14-də Binəqədi Rayon Məhkməsinə çıxarılıb və İnzibati Xətalar Məcəlləsinin 206-cı maddəsi ilə (Qanunsuz olaraq narkotik vasitələrin, psixotrop maddələrin istehlakı, satış məqsədi olmadan şəxsi istehlak miqdarında hazırlanması, əldə edilməsi, saxlanılması, daşınması və ya göndərilməsi) təqsirli bilinərək 300 (üç yüz manat) cərimə olunub.
Heç vaxt narkotik maddədən istifadə etmədiyini deyən Müsavatçı fəal həbsinin qurama olduğunu və buna görə də məhkəmə qərarından şikayət verəcəyini söyləyir.
“Qərarı hələ verməyiblər, qərar verilədən sonra mən də öz şikayətimi edəcəyəm”, partiya fəalı vurğulayıb.
O, saxlanmasının və cərimə olunmasının səbəbini bilmədiyini söyləyir. İlqar Mahmud əlavə edir ki, sentyabrın 13-də Bakı-Sumqayıt yolundakı Ekologiya postunun yaxınlığında 3 nəfər mülki geyimli şəxs onu saxlayaraq 6 saylı Polis Bölməsinə gətirib:
“Polis bölməsinə girəndə gördüm ki, burada hal şahidi, video və sairə hamısı hazırdır”,İ.Mahmud bildirib.
Onun sözlərinə görə, daha sonra narkoloji testdən keçirilmək üçün Maştağa qəsəbəsinə aparılıb:
“Mən orada həkimə dedim ki, əgər saxta sənəd versən səninlə Avropa İnsan Hüquqları Məhkəməsində görüşcəyik, amma yenə də öz bildiklərini etdilər” deyə İ.Mahmud qeyd edib (azadliq.org).
***
13.09.2019
Sentyabrın 13-də Müsavat Partiyasının fəalı İlqar Mahmud Bakıda yaşadğı evin yaxınlığında saxlanaraq naməlum istiqamətə aparılıb.
Müsavat Partiyasının məlumatına görə, indiyədək fəalın harada saxlanıldığını müəyyən edə bilməyiblər.
İlqar Mahmud partiyanın Laçın təşkilatının üzvüdür. “Qarabağa qayıdış” hərəkatının fəallarındandır. Köçkünlərin tədbirlərində həmişə fəal şəkildə iştirak edir.
“İlqar Mahmud “Qarabağa qayıdış” təşkilatının fəallarındandır. Son vaxtlar ABŞ və Türkiyə səfirlikləri qarşısında keçirilən piketlərdə fəal iştirak edib. O, sosial şəbəkədə canlı yayım vasitəsilə Laçının qaytarılması mövzusunda tələblər səsləndirib”, Müsavat Partiyası bildirib.
