AXCP sədri Əli Kərimlinin qaynı, bu ilin martında ölkə prezidentinin əfv sərəncamıyla azadlığa çıxan Elnur Seyidov həbsdə olduğu müddətdə əmlakının da əlindən alındığını deyir. Bununla əlaqədar E.Seyidov hələ həbsdə olduğu vaxtdan məhkəmədə iddia qaldırıb. Ötən 3 ildə bu məsələyə Yasamal və Nizami rayon məhkəmələrində, iki dəfə Bakı Apellyasiya Məhkəməsində, bir dəfə Ali Məhkəmədə baxılıb. Amma qərarların heç biri E.Seyidovun xeyrinə olmayıb.
Mübahisə predmeti isə «Dərəçiçək» Mənzil-Tikinti Kooperativinin Yasamalda, Şərifzadə küçəsində inşa etdiyi binadakı qeyri-yaşayış sahəsidir.
E.Seyidovun vəkili Nemət Kərimli AzadlıqRadiosuna danışır ki, müvəkkili hələ həbs olunmamışdan öncə – 2011-ci il martın 31-də şirkətlə müqavilə bağlayıb, əmlakın pulunu tam ödəyib, əlində də bunu təsdiqləyən sənədlərin hamısı var. Ancaq ötən illər ərzində əmlak təhvil verilməyib. Tələb edəndə isə bildirilib ki, onların əmlakı yoxdur, tələb olunan isə başqasına məxsusdur, çünki ona satılıb.
E.Seyidov öncə Yasamal rayon Məhkəməsində iddia qaldırıb. Məhkəmədən tələbi sahiblik hüququnun tanınıb əmlakın təhvil verilməsiylə yanaşı, həm də 2014-cü ildən başlayaraq, qətnamə icra olunana qədər hər ay üçün icarə haqqı kimi 10 min manat, mənəvi zərərə görə isə 20 min manat tələb edib. Məhkəmə iddianı qismən təmin edib, əmlakın E.Seyidovun sahibliyinə və istifadəsinə verilməsinə qərar verilib.
Tikinti şirkətinin direktoru Seyran Əhmədov bu qərardan apellyasiya şikayəti verib. Eyni zamanda, Zahir Nəcəfov da müstəqil tələb irəli sürməyən üçüncü şəxs qismində prosesə qoşulub. Qarşılıqlı iddia qaldıraraq, şirkətlə E.Seyidov arasındakı müqavilənin ləğvini istəyib.
