Elçin Qasımov
MBH İdarə Heyətinin sədri, ilahiyyatçı
İnkişaf etmək, azad olmaq, güclü və qüdrətli olmaq hər bir xalqın arzusudur. Yeter ki, xalqlar öz inkişaflarını başqa xalqların tənəzzülü hesabına etməyə çalışmasınlar.
Dünya xalqlarının bir başa və yaxud dolayısı yolla əsarətdə olması bu gün bəşəriyyətin mövcud durumu ilə tanış olan heç bir insana sirr deyil. Onların bir hissəsi həm sözdə, həm də əməldə əsarətdədir. Bir qismi isə sözdə azad olsa da, əməldə əsarət altındadır. Bir sözlə, yer kürəsində yaşayan çoxsaylı xalqların kiçik bir hissəsi diktə edən, yerdə qalanı isə diktə olunan tərəfdir. Fərq etməz istər qismən, istərsə də tamamilə əsarət altında olanların bu vəziyyətə düşməsinin səbəblərini müxtəlif cür izah edənlər var. Bəziləri bunu xalqların sayına, bəziləri maddi imkanlarının genişliyinə, bəziləri yeraltı sərvətlərin çoxluğuna və buna bənzər daha başqa səbəblərə görə olduğunu açıqlaya bilərlər. Əvvəlcədən onu deyim ki, say azlığı mübarizədə əsas rol oynamır. Eyni zamanda xalqların əsarət altına düşmə səbəbləri sırf maddi nemətlərlə də bağlı deyil. Nə çox maddi zəngin dövlətlər var ki, diktə edən yox, diktə olunan tərəfdirlər. Hətta zəngin sərvətlərə malik torpaqlarda yaşayanların bir çoxu əksər sahələrdə asılılıqdan qurtula bilmirlər. Aslılıq da öz növbəsində əsarətin bir növüdür. Yeri gəlmişkən müasir dünyamızda əsarətin bu növü çox yayqındır. Xüsusən də yenicə müstəqillik qazanmış xalqlara qarşı bu siyasətin aparılmasına daha çox rast gəlinir. Asılılıq diktə edən tərəflərin gələcəkdə öz tələblərini irəli sürmək baxımından mühüm amilə çevrilir. Bu öz müstəqilliyini min bir müsibətlə bərpa edənlərin başına gətirilir. O ki qaldı öz müstəqil dövlətləri hələ də olmayanlara, onlar isə birbaşa əsarət altında olanlardır. Allaha çox şükürlər olsun ki, dünya xalqlarının az bir hissəsinə qismət olan öz dövlətini qurmaq müstəqillik nemətini bizə nəsib etmişdir. Lakin hər şey müstəqilliyi əldə etməklə bitmir. Əksinə bu misilsiz neməti qoruyub saxlamaq, onu möhkəmləndirmək və gələcəyini qaranta almaq daha məsuliyyətli və çətin vəzifədir. Biz hər birimiz bir azərbaycanlı olaraq müstəqilliyimizə, dövlətçiliyimizə yönələn istənilən təhlükənin qarşısını almaq istiqamətində fəaliyyət göstərməli və bu yolda cəsarətlə mübarizə aparmalıyıq. Bu istiqamətdə müvəffəq olmaq üçün ayıq-sayıq olmalı, birliyimizi daha da möhkəmləndirməliyik. Və ən əsası xəyanətkarlara qarşı birgə mübarizə aparmalıyıq. Fərq etməz bu xəyanətkar hansı cəbhədə olursa olsun, istər müxalifət nümayəndəsi olsun, istər vətəndaş cəmiyyətinin üzvü, istərsə də iqtidarda. Vətən sevgisi olmayanlara heç bir cəbhədə yer yoxdur. Öz millətinin, dövlətinin maraqlarını başqalarının maraqlarına qurban verənlərin xəyanəti nəticəsində xalqlar diktə olunan tərəfə çevrilirlər. Xüsusən də həmin adamlar əgər vəzifə başındadırlarsa. Bunun artıq biz acı təcrübəsini yaşamışıq. Keçmiş Milli Təhlükəsizlik Nazirliyinin timsalında. O, insanlar ki, xalqın maraqlarını öz şəxsi maraqlarına qurban verirlər, onlara etibar edilən və yaxud da qəsb etdikləri sahələri şəxsi mənafeləri naminə istismar edirlər, milli sərvətləri talan edirlər, belələri müstəqilliyə, dövlətçiliyə ən ciddi təhdiddir. Xəyanətkarlıq xalqları əsarət altına salan ən başlıca amillərdəndir. Bizim hər birimizin belə xəyanərkarları ifşa etmək müqəddəs vəzifəmizdir. Müqəddəs kitabımız milli kimlik barədə bəşəriyyətə əsrarəngiz bir mesaj verir.
“Ey insanlar! Biz sizi bir kişi və bir qadından yaratdıq. ( Adəm və Həvvadan). Sonra bir-birinizi tanıyasınız deyə (kimliyinizi biləsiniz) sizi xalqlara və qəbilələrə ayırdıq. Allah yanında ən hörmətli olanınız ən təqvalı (pis əməllərdən ən çox çəkinəniniz) olanınızdır”. Diqqət etsək görərik ki, Allah bi mesajını “ey insanlar” xitabı ilə başlayır. Və aydın olur ki, çatdırılmaq istənilən mətləb hər hansı bir zümrəyə deyil, bütün insanlığa aiddir. Əvvəla münaqişələrə, didişmələrə, təcavüzə son qoymaq çağırışı edilir. Və bütün insanlara bir kişi və bir qadından yaradıldıqları xatırlanır. Daha sonra insanların müxtəlif millətlərə bölünməsinin səbəbi kimliklərinin tanınması və bir-birlərini tanımaq məqsədi daşıdığı göstərilir. Belə aydın olur ki, heç bir xalq, millət biri digərindən üstün yaradılmayıb. Heç bir xalqın digəri üzərində hegemonluq etməyə haqqı yoxdur. Əziz İslam Peyğəmbəri milliyətçə ərəb idi. Amma görün nə deyir! “Ərəbin ərəb olmayana üstünlüyü təqvadan başqa bir şey deyildir”. Beləliklə üstünlük meyarının hər hansı bir millətin nümayəndəsi olmaqla deyil, təqva, yəni düzgünlük, günahsızlıq, vicdanlı olmaq, pis əməllərdən çəkinməklə mümkünlüyü aydın olur. “Ey Adəm övladı, heç kəsə kölə olma, Allah səni azad yaradıb”. Bu Həzrəti Əli dühasının insanın yaradılışdan azad olması barədə söylədiyi bir kəlamdır. Başqalarına zülm ermək və onları əsarətdə saxlamaq qadağan olunduğu kimi, başqalarının zülmünə təslim olmaq və köləsi olmaq da qadağandır, insanın yaradılış fitrətinə ziddir. Heç bir insanı adı ucaltmır. İnsan əməli ilə adını ucaltdığı kimi, milləti ucaldan da, adını batıran da onun nümayəndələrinin əməlləridir. Və ən nəhayət sözümün canı və açıqlamaq istədiyim ən ali mətləb: Həyatda mütləq həqiqət deyilən məfhumlar vardır ki, onları seçmək bizim iradəmizdən asılı deyil. Baxın, heç bir insan öz bioloji valideynlərini, ata-anasını özü seçmir. Bu İlahi təqdirdir. Eləcə də biz hansı xalqın nümayəndəsi olaraq, hansı vətənin qoynunda dünyaya göz açacağımızı da özümüz müəyyən etmirik. Bu da İlahi təqdirdir. Yalnız xəyanətkarlar öz doğulduqları vətənlərini başqasına dəyişirlər. Necə ki, ən rəzil insanlar öz doğma ata-analarını qocalar evinə yerləşdirirlər. İradəmizdən asılı olmayan seçimləri bizə tanırdıran Uca Tanrı onlarla rəftarı da bizlərə bətan edir. Allah Ona və valideynlərə şükr etməyi bizə əmr edir. Valideynlərin necə olmasından asılı olmayaraq onlarla xoş rəftar etməyi, xidmətlərində dayanmağı, hətta “uff” belə deməməyi bildirir. Eləcə də milli kimliyimizi təqdir edən Tanrı onun təəssübünü çəkməyi, azadlığı uğrunda mübarizə aparmağı, vətəni sevməyi və onu qorumağı da bizə tapşırır. Boş yerə deyilməyib Vətən Anadır. Vətənin anayla müqayisəsi təsadüfi deyil. Hər ikisi müqəddəs dəyərdir. Anasını qoruyan oğul vətəninə də sözün əsl mənasında övlad olmalıdır. Vətəni qorumaq, milli kimliyi yaşatmaq və xalqımızın azadlığı uğrunda mübarizə aparmaq hər birimizin borcudur. Fərq etməz düşmən səngərdə olsun və yaxud da öz içimizdə. Bizə təcavüz edənlərin hər biri qarşısında Azərbaycan xalqının mərd igidlərini görəcəklər. Müstəqil dövlətimizin keşiyində durmaq müsəlman Azərbaycan xalqının müqəddəs vəzifəsidir. Buna görə də xalq olaraq vəhdət təşkil etməli, dəyərlərimizi qorumalıyıq. Belə olan halda yaxşını pis, pisi yaxşı kimi göstərənlərin əsl xəyanətkarları ifşa edə bilərik. İnkişaf etmək, azad olmaq, güclü – qüvvətli olmaq biz Azərbaycan xalqının da haqqıdır. Yetər ki, bir olaq, cəsarətli olaq, ədalətli olaq, haqqa bağlı olaq, azad olaq!
Deyir, Quran qurun Vəhdət
Bu yolda var hər an izzət
Edir Haqqa bizi dəvət.
Müsəlman Birliyi Hərəkatı!
